Un Luchon mès efectiu se´n pòrte eth derby deth Portilhon

U.E. Bossòst 2 – B. Luchon 4 

Bon partit damb fòrça gols eth d’aguest darrèr diuendres en Bossòst . Er equip aranés començèc fòrça ben e auec diuerses arribades en àrea deth Luchon que non podec concretar, uns viatges per ua dolenta definicion dauant era porteríía e un aute viatge pes excelents arturades deth portèr Laumond que evitèc qu’era U.E. Bossòst prenesse auança en mercador. Eth Luchon anaue a profitar as 30’ un lançament de fauta en qu’era pilota desviada per Marcos, anaue a quèir enes botes de Farrus que des de dehora der àrea plaçaue un shut ras a tocar deth garròt. Ère eth 0-1.  Er equip aranés responèc damb un gran shut de Castet qu’anaue entara esquaira mès eth portèr francés hège ua gran arturada desviant era pilota entà cornèr. Precisament Luchon profitaue un lançament de cornèr en que Laporte tot solet remataue de cap era pilota laguens dera porteríía. Ère eth 0-2, resultat damb eth que s’arribaue ath descans.

Ena dusaua mietat mès domini aranés sense poder acabar de horadar era porteria francesa. Coma passe tostemp ena prumèra arribada deth Luchon en àrea aranesa Laporte shutaue ras a tocar deth garròt e mercaue eth 0-3. Era U.E. Bossòst continuèc luitant e en 5’ anaue a mercar 2 gols en dues bones rematades de cap d’Ignasi e Kikon que deishauen eth mercador en un emocionant 2-3 a manca de 10’ entath finau. Es aranesi auérem 2-3 ocasions entà mercar eth 3-3, mès era bona actuacion deth portèr Laumond ( milhor jogador deth Luchon) evitèc er empat. Ena darrèra jogada deth partit Munill anaue a mercar damb un polit shut eth darrèr gol. ÈEre eth 2-4 resultat ath finau deth partit.

Ath finau derròta en aguest derby a on encaishèrem massa gols e ath delà mos trapèrem ua molt bona actuacion deth portèr francés que facilitèc era victòria deth sòn equip

Eth pròplèu partit jogam eth diuendres 18 de mai tàs 21 :00 en Encausse contra er equip locau, campion d’aguest campionat d’Excellence d’aguesta sason dempús dera sua victòria aguesta dimenjada en Latoue contra er E.F.C. Aurignac II.

U.E. Bossòst: Marcos, Miquel, Javito, Felipe, Salva, Peiro, Gachi, Marco, Ignasi, Àlex, Javi C..  Remplaçants: Dani, Alvaro, Kikon.

Trainer: Jordi.

B. Luchon: Laumond, Lansalot, Van Mo, El Mahraoui, Coutinho, Revertegat, Berges, Boy, Laporte, Munill, Bertin. Remplaçants: Farrus, Sarrato, Arnauduc.

Trainer: Gomez Frederic, Farrus Eric.

  

Gols: 0-1 Farrus (30’), 0-2 Laporte (40’), 0-3 Laporte (60’), 1-3 Ignasi (75’), 2-3 Kikon (80’),2-4 Munill (93’).

Arbitre: Darnaud Claude

Liniers : Darnaud Corentin, Lompech Antoine.