¡¡¡ Guanham en un finau tens !!!

F.C. Mabroc II 1 - U.E. Bossòst 2

Bona victòria era artenhuda aguest darrèr dissabte en Martres Tolosane contra er equip deth F.C. Mabroc II. Eth partit començèc fòrça ben entà nosati: sonque trèir de centre sense que cap jogador francés toquèsse era pilota, Àlex mercaue d’un gran shut damb era cama esquèra plaçant era pilota ena esquaira dera porteria francesa. Ère eth 0-1 e sonque portàuem en tot jogat 20” de partit. En aguesta prumèra mietat er equip francés sajaue de profitar es lançaments de cornèr o fautes entà empatar eth partit. Lèu deth descans auérem ua gran ocasion quan Àlex se quedaue dauant de Querre e eth sòn shut siguec desviat peth portèr. Damb eth 0-1 s’arribaue ath descans.

Ena dusaua mietat eth protagonisme der arbitre enes tarjetes blanques que comporte era expulsion deth jogador pendent 10’ mos penalizèc a nosati dus viatges e ath contrari , un viatge. Ath quart d’ora eth F.C. Mabroc profitaue un lançament de fauta de Lapuyade tà profitar eth delantèr era pilota retornada per Pol entà empatar a 1 gol eth partit. Cada equip auérem dues grans ocasions enes lançaments enes garròts per part de Lapuyade e Marco. En ua jogada laguens der área rematada per Gachi, eth defensa francés metie era man entà evitar qu’era pilota entrèsse; eth clar penalti siguec shutat per Felipe mercant eth 1-2. A compdar d’alavetz eth partit se tornèc mès tens e damb un jòc mes nerviós per part des dus equips çò que comportèc era expulsion per dusaua tarjeta jauna de Javi. Mos toquèc patir es darrèrs menutes damb 10 jogadors, mès era solidesa defensiua der equip aranés non permetèc cap ocasion de gol.

Ath finau, victòria en un partit tens ; eri non se demoràuem pèrder dempús d’empatà-mos eth partit. Aguest resultat mos torne a recuperar eth 5ua lòc dera classificacion.

Eth pròplèu partit jogam d’açi dues dimenjades en Bossòst eth derby deth Portilhon : dissabte 12 de mai tàs 20:00 ores contra er equip deth B. Luchon S.P.

F.C. Mabroc II: Querre, Perdreau, Chauchart, Casties, Dalleau, Lapuyade, Maleplate, Descuns, Martin, Hritane, Beraudo.. Remplaçants: Tissieres, Castet, Bousquet

Trainer: Tetard Guy.

Tarjetes auriòles: Lapuyade, Dalleau.

U.E. Bossòst: Pol, Miquel, Javito, Felipe, Salva, Peiro, Gachi, Marco, Guille, Àlex, Dani.  Remplaçants: Javi

Trainer: Jordi.

Tarjetes auriòles : Javi

Tarjeta vermelha: Javi

Gols: 0-1 Àlex (1’), 1-1 Bousquet (60’), 1-2 Felipe (p. 75’).

Arbitre: Hubert Marc.

Liniers : Gueguen Hugues, Bellour Mohamed.

¡¡¡ Espectacular partit mes quin domatge de resultat !!!

Pyrenees Sud 6 - U.E. Bossòst 4

Pluia de gols aguest darrèr dissabte en Gourdan. Er equip aranés portèc era iniciatiua en mercador ¾ parts deth partit, mes en darrèr quart d’ora er equip francés remontaue en mercador. Ena prumèra mietat as 10 menutes mercauen eth 0-1 quant Àlex se presentaue dauant eth portèr e lo driblaue entà mercar a porta bueda. Ara seguida iauèc era jogada clau deth partit quan en ua jogada molt semblanta Àlex ere derribat clarament laguens der área peth portèr. Er arbitre non fiulèc arren, ere un clar penalty ne tampoc era possible expulsión deth portèr francés. Deth posible 0-2, passeren ath 1-1 quant Borreda V., aprofitaue tot solet ua pilota laguens der área entà shutar. Tornauem a auançamos damb un esplendid shut d’Àlex ena esquaira dera portería ere eth 1-2. En ua fauta shutada rapidament Daffos sorprenia ara defensa aranesa entà mercar de cap eth 2-2, resultat que s’arribarie ath descans.

Ena dusaua mietat gesserem molt ben e ath quart d’ora ja guanhauem per 2-4 dempús de qu’Àlex tornese a mercar dos explendids gols. Encara quedaue mieja ora de joc e solet auiem un canvi qu’auiem realitzat ena prumèra mietat pera lesión de Miquel. Eth Pyrenees Sud damb lançaments de pilota longa aprofitèc eth cansament der equip aranés e anaue a remontar en mercador : Daffos, Ortet, Anel (2) anauem a mercar enes darreres 20 menutes e deishauen eth mercador damb eth 6-4.

Ath finau ua derròta en un mercador de tenis. Un partit que se mos hèc massa long e que podíem aué artenhut un milhor resultat dempús de mercar 4 gols dehòra de casa.

Eth pròplèu partit jogam d’açi dues dimenjades en Martres Tolosane eth dissabte 28 d’abriu tàs 20:00 ores contra er equip deth F.C. Mabroc.

Pyrenees Sud: Diaz, Reulet, Clave, Talavera, Alarcon, Pujol, Ortet, Borreda V., Daffos,  Borreda N., Fourment. Remplaçants: Larque, Toumane, Anel.

Trainer:Anel Florent.

Tarjetes auriòles: Alarcon

U.E. Bossòst: Manu, Miquel, Javito, Felipe, Peiro, Uri, Ignasi, Mampel, Àlex, Dani, e Alvaro. Remplaçants: Ferri.

Trainer: Jordi.

Tarjetes auriòles : Uri, Mampel, Alex.

Gols: 0-1 Àlex (10’), 1-1 Borreda V.(15’), 1-2 Àlex (25’), 2-2 Daffos (35’), 2-3 Àlex (50’), 2-4 Àlex (60’), 3-4 Daffos (70’), 4-4 Ortet (80’), 5-4 Anel (85’), 6-4 Anel (90’).

Arbitre: Laven Michael.

Liniers : Souifi Hacen, D’Angelo Damien.

Derròta trista

U.E. Bossòst 1 – E.F.C. Aurignac II 2

Derròta contra er Aurignac, un equip qu’arribèc sonque damb un cambi, mès que se placèc fòrça ben en terren de jòc e profitèc es nòsti errors defensius. Era U.E. Bossòst portèc era iniciatiua deth jòc pendent es 90 menutes, mès mos costèc plan mercar un gol enes multiples oportunitas qu’auérem. Ena prumèra mietat Luis, shutaue en garròt dera portería francesa. Eth portèr Dzuman auec de despejar damb es punhs dues fautes laterals shutades pes delantèrs aranesi. En ua pilota enviada ath nòste portèr Pol, aguest tardèc un sinhau en shutar e era pilota tocaue a Plante e s’introduie laguens dera nòsta portería. Ère eth 0-1 mercat casi sense arribar ena nòsta portería. Damb aguest resultat s’arribaue ath descans.

Ena dusaua mietat , er equip aranés en tot sajar d’empatar eth partit e un Aurignac ben posicionat que non se dejaue suspréner. Ath delà, passat eth quart d’ora Dumazert anaue a profitar ua pilota longa entà escapà-se dera defensa aranesa e plantà-se dauant deth portèr e mercar eth 0-2. Era faena encara se complicaue mès quan un shut de falta de Charles anaue a tocar eth garròt dera porteria ben defenuda per Dzuman.

En ua jogada pera dreta de Marco eth sòn centre siguec aprofitat per Ignasi entà mercar eth 1-2. Encara quedauen 5 menutes e auérem un parelh d’ocasions entà empatar eth partit mès non podec èster e eth partit acabèc damb eth 1-2.

Ath finau, derròta trista que mos deishe en sisau lòc dera classificacion empatadi a 25 punts damb er Aurignac.

Eth pròplèu partit jogam en Gourdan-Polignan eth dissabte 14 d’abriu tàs 20:00 ores contra er equip deth Pyrénées Sud, dusau classificat deth campionat.

U.E. Bossòst: Pol, Salva, Javito, Felipe, Peiro, Luis, Ignasi, Gachi, Alex, Charles, e Javi. Remplaçants: Paba, Guille, Marco

Trainer: Jordi.

Tarjetes auriòles : Gachi, Paba.

Tarjeta vermelha: Paba

E.F.C. Aurignac II: Dzuman, Mallet, Benazet, Hurle, Lestrade, Zunnui, Rey, Boue, Dumazert, Scymczak, Plante. Remplaçant : Mayet.

Trainer : Benac Gilles.

Tarjetes auriòles : Hurle, Zunnui, Dumazert.

Gols: 0-1 Plante (25’), 0-2 Dumazert (70’), 1-2 Ignasi (86’).

Arbitre: Martins Seraphin.

Liniers : Hubert Marc, Almansa Miguel.

Eth Comité de Competicion mos da era raçon

U.S. Cazères 0 - U.E. Bossòst 3

Eth Comité de Competicion mos a dat era raçon pera alinhacion indeuida deth jogador deth Cazères Conde Oumar que auie de complir un partit de sancion a compdar deth 19 de març e per tant non estaue qualificat entà poder jogar contra nosati eth passat 24 de març. Partit guanhat per 0-3.

Era classificacion ( a manca de 6 partits ) ei era seguënta: Encausse 40, Pyrennees Sud 33, Cazeres 30, Landothe 27, U.E. Bossòst 25, Aurignac 22, B.luchon 20, Boulogne e Mabroc 17, Comminges St. Gaudens 14, Pointis-Inard 10, Etoile du Cagire 5.

Aguest dissabte 7 d’abriu tàs 20 :00 partit en Bossòst contra er E.F.C. Aurignac II.