dilluns, 5 de maig de 2014

Mos empaten enes darrèrs 10 menutes

U.E. Bossòst 2 – Ent. Landorthe 2

Domatge de resultat eth d’aguest partit disputat eth dissabte en Bossòst. Era U.E. Bossòst començèc fòrça ben eth partit. As 5 menutes, Ignasi ère derribat laguens der àrea e eth clar penalty fiulat per arbitre siguec shutat per Felipe : mercam eth 1-0. Eth Landorthe responec damb jogades de perilh a pilota arturada, cornèrs e fautes qu’ eth portèr aranés Pol podie arturar. Ena menuta 30 , en un lançament de fauta d’ Àlex, Felipe remataue de cap e mercaue eth 2-0. En un shut dera delantera aranesa, Lacaze I desviaue era pilota e Luis des de laguens der àrea shutaue per dessús dera porteria. Lèu deth descans, eth Landorhe reclamaue un penalty per queiguda de Nebra. Damb eth resultat de 2-0 s’arribaue ath descans.
Ena dusaua mietat, as 10 menutes se produsie era jogada que cambiarie eth partit; era U.E. Bossòst se quedaue damb 10 jogadors en ua jogada ena qu’ er arbitre non i auie vist arren, mès siguec pressionat peth Landorthe entà qu’ acabèsse expulsat. Damb 10 jogadors, en principi, eth Landorthe a despiet de dominar non creèc guaire perilh. Era U.E. Bossòst podec sentenciar eth partit en dues bones ocasions de Miguel e Puente. Era ocasion mès clara l’ auec Pèir que, tot solet e a un mètre  dera porteria, shutèc entà dehòra. Eth Landorthe anaue a profitar dues jogades fòrça semblantes entà presentà-se dauant de Pol e mercar es dus gols damb es que mos empatàuen eth partit en ues posicions des delantèrs bastant dubtoses.
Ath finau, un empat damb regust amargós dempús der avantatge que portàuem en mercador; siguec un partit semblant ath deth SaliesMane en que mos adelantam en mercador per dus gols e ena dusaua mietat ,per diverses circunstàncies, acabam demanam era ora. Mos queden tres partits e èm damb era calculadora a veir se mos quedam en Excellence. Era classificacion, damb es equips implicadi en descens ei atau: Etoile Cagire 41, SaliesMane 39, Montastruc 38, U.E. Bossòst 36 e Cazaril 34.  Eth SaliesMane a disputat un partit de mès e aguesta semana i a es partits pendents: uns enfrentaments directes entre Montastruc-Etoile Cagire e U.E. Bossòst-Cazaril.

Eth pròplèu partit jogam en Bossòst  eth dissabte 10 de mai tàs 20:00 contra er equip deth Cazaril: un equip damb eth que mos enfrentaram dus viatges ara seguida pr’amor qu’aguest partit ei deth prumèr tour.

U.E. Bossòst : Pol, Héctor, Chapo, Felipe, Antonio, Àlex, Luis, Ignasi, Rubén, Adri,  e Pèir. Remplaçants: Gachi, Miguel, Puente.
Trainer: Adrian.
Tarjetes auriòles : Héctor, Pèir.
Tarjeta vermelha: Pèir.

Ent. Landorthe : Lacaze I, Bernadas, Aouam, Beantes, Dutheil, Bosc, Lacaze II, Ferreira, Junca, Nebra, Noel. Remplaçants: Tombini, Gardien, Perroud.
Trainer : Duchein Fabrice.
Tarjetes auriòles : Ferreira

Gols : 1-0 Felipe (5’ p.), 2-0 Felipe (30’), 2-1 Noel (80’), 2-2 Junca (88’).


Arbitre : Darnaud Claude.

Cap comentari: