Empatam eth darrèr partit deth campionat

U.S. Cazeres 1 - U.E. Bossòst 1

Empat que mos a sabut a poc, dempús de jogar eth darrèr partit deth campionat. Era U.E. Bossòst presentaue un equip fòrça joen, mès non se notèc bric eth sòn joc e siguèc er equip deth Bossòst que portèc era iniciatiua deth jòc en tot eth moment. Eth Cazeres marquèc en ua jogada individuau de Couzinet que se plantèc dauant de Marcos e shutèc per baish ena gessuda deth portèr aranés. Era U.E. Bossòst podèc marcar ena prumèra mietat donques Paba shutaue en trauesèr dera porteria e Àlex , tot solet laguens der àrea, shutaue desviat entà dehòra dera porteria. Tamb eth 1-0 s’arribaue ath descans.
Ena dusaua mietat, sonque començar, artenhíem er empat en ua jogada entre Paba e Ignasi; aguèst darrèr, marcaue en shut suau ena gessuda deth portèr deth Cazeres. Ara seguida auèrem un auta bona ocasion en un shut de Paba que tocaue eth garròt dera porteria. Felipe en un aute shut tocaue eth trauesèr. Auèrem mès ocasions entà poder-mos emportar era victòria mès ath finau 1-1 en marcador.
Cau díder tanben que jogàuem per prumèr viatge en un terren de jòc de èrba artificiau e açò perjudiquèc mès ath equip aranés poc acostumat en aguest tipus de superficie.
Ara sonque queda , entà acabar era sason, era disputa dera Copa de Comminges qu’ aurà loc eth pròplèu dimenge dia 5 de junh tàs 16:30 en St. Gaudens entre es equips de ClaracPointis e U.S. Garonne. Ei un domatge ara fin de non i poder estar, portam dus ans consecutius en tot èster eliminadi ena semifinau.
Ara, a descansar pràcticamente dus mesi. Er equip tornarà a començar es sòns entrenaments era darrèra setmana deth mes de juriòl.
¡¡¡ Bon estiu entà toti !!!

Gols :1-0 Couzinet (25’), 1-1 Ignasi (50’)
Arbitre: Castro Antoine.

Derròta pera mínima ena repeticion dera ½ finau dera Copa de Comminges

U.S. Garonne 1 - U.E. Bossòst 0

Derròta pera mínima en un partit en qu’ era igualtat siguèc present en tot eth partit. Cap des dus equips dominèc clarament. Ena prumèra mietat, poques ocasions: ua per cada equip en shuts de luenh. Prumèr , Felipe en agarrar ua pilota ena frotau der àrea , shutaue e era pilota ère desviada entà cornèr per Crinon e dempús Marcos , en un shut de luenh de Dutheil desviaue tanben entà cornèr. Tamb 0-0 s’arribaue ath descans.
Ena dusaua mietat, auèrem es milhors ocasions entà poder marcar. Pèir, a pasada d’Ignasi se quedaue dauant eth portèr e eth sòn shut tocaue en traueser dera porteria. Eth Garonne responèc tamb er ùnic gol deth partit en que Saurrat, en ua posicion mès que dubtosa, agarraue era pilota dempús d’ un rebot e se plantaue dauant de Marcos entà marcar eth 1-0. Era U.E. Bossòst sajèc d’ empatar eth partit e Pèir auèc ua bona ocasion en un lançament de fauta que tocaue un aute viatge en traueser dera porteria francesa.
Ath finau , derròta ena ½ finau de Comminge mès longa dera istòria ena qu’ er equip aranés dera U.E. Bossòst, ath delà de non jogar sòns milhors partits, patíe baishes plan importants e tanpòc mos a acompanhat era sort enes rematades enes garròts dera porteria contraria.
Aguest pròplèu diuendres 27 de mai, tàs 21 :00 ores, jogam eth darrèr partit dera sason en Cazeres contra er equip locau.

U.S. Garonne: Crinon, Dutheil, Verge, Baboulet, Loutfi, Heuillet, Pellegrini, Watel, Saurrat, Pailloux, Silvert. Remplaçants : Essaoui, Saaf, Saurat.
Trainer : Laplagne Jean Michel.
Tarjetes auriòles : Pailloux.

U.E. Bossòst: Marcos, Marc, Miguel, Jaime, Miguel, Gachi (70’ Javi Castet), Alex, Paba, Madrid (35’ Ariel), Ignasi e Pèir.
Trainer: Adrian.

Gols :1-0 Saurrat (70’).
Arbitre: Laven Mickael.
Liniers :Cunha Philippe, Diebling Lucien.

Jogaram en Gourdan

Era repeticion deth partit dera 1/2 finau dera Copa de Comminges entre U.S. Garonne e U.E. Bossòst se jogarà eth dimenge 22 de mai tàs 15:00 en Gourdan a porta barrada, sense poder aué cap espectador de cap equip.

Derròta en darrèr partit en casa

U.E. Bossòst 0 – E.S. Martres Tolosane 2

Derròta en darrèr partit en casa, en un partit poc vistòs en qu’ eth Martres se trapèc tamb ua victòria inesperada.
Sonque en començar, ena menuta 3´, Gomes shutaue de luenh e agarraue a Marcos mau plaçat e marcaue eth 0-1. Era U.E. Bossòst sajèc d’ igualar en marcador mès es intervencions deth portèr Firmino a shuts de Pèir impedic de marcar ath equip aranés. Tamb eth 0-1 s’arribaue ath descans.
Ena dusaua mietat, as 10 menutes en un error defensiu , Gomes tornaue a marcar tath Martres e plaçaue eth 0-2 en marcador. Era U.E. Bossòst auèc pòques oportunitats entà reduir eth marcador, sonque un shut d’Ariel qu’ anèc entà dehòra.
Ath finau, derròta. Ei vertat que patíem baishes importants mès er equip non joguèc bric ben.
Aguesta setmana mos auem reunit tamb era F.F.F. eth dimarts e diuendres pes hèts deth partit dera Copa de Comminges entre U.S. Garonne e U.E. Bossòst e era Comission de Litiges e discipline a decidit de tornar a jogar tot eth partit a porta barrada. Ara, ei era Comission de Copes e Campionats era qu’ a de díder eth lòc, dia e ora a jogar aguesta ½ finau dera Copa de Comminges. En principi semble èster que se jogaria aguesta pròplèu dimenjada.

U.E. Bossòst: Marcos, Alex, Miguel, Juanka, Marc, Gachi (60’ Ariel), Polilla (45’ Dani), Paba, Sergio, Javi(60’ Ignasi) e Pèir.
Trainer: Jordi.

E.S. MartresTolosane : Firmino, Querre, Gobet, Chang, Coutanceau, Carayon, Vivini, Batralle, Tetard I, Gomes, Caillouet.Remplaçants : Tetard II.
Trainer : Tetard Guy.
Tarjetes auriòles :Carayon (35’).

Gols :0-1 Gomes(3’), 0-2 Gomes (60’)
Arbitre: Castro Antoine.

Derròta ena darrèra menuta

ET Canton St Martory 3 - U.E. Bossòst 2

Derròta ena darrèra menuta en partit disputat aguest darrér dissabte en Lestelle. Era U.E. Bossòst presentaue fòrça baishes en sòn equip e ath finau sonque 11 jogadors, sense auer cap de cambi. Eth St. Martory se jogaue fòrça mès que nosati en partit e comencèc fòrça fort e ja enes prumère menutes auèc ocasions entà marcar. Ena menuta 30 artenhíe eth 1-0 en un cornèr en que Abdou remataue tot solet en àrea petita. Era U.E. Bossòst solet s’apropèc tamb perilh en un shut de luenh de Miguel qu’eth portèr Delhaye desvièc entath cornèr. Tamb eth 1-0 s’arribaue ath descans.
Ena dusaua mietat, era U.E. Bossòst s’apropèc mès ara porteria deth St. Martory e atau Paba artenhíe er empat a 1 dempús d’ ua jogada individuau. Eth St Martory sonque 5 menutes mès tard artenhíe eth 2-1 en ua rematada de cap de Houe. En ua jogada en qu’ eth St Martory reclamèc ua fauta, Madrid agarrèc era pilota e per velocitat se plantèc dauant Delhaye e shutaue ras entà marcar er empat a 2 gols. Encara quedaue un quart d’ora entà acabar. Ignasi realizèc ua bona arturada en un cop de cap d’Abdou. Miguel auèc era ocasion entà adelantà-mos en marcador en plantar-se dauant eth portèr francés, mès eth sòn shut de vaselina, anèc entà dehòra per dessús deth garròt. Ena darrèra menuta ,Abdou a centrada de Candani, artenhíe eth 3-2 resultat que serie definitiu ja qu’ èrem ena menuta 90 deth partit.
Ath finau , derròta en darrèr moment, en un partit en qu’ er equip presentaue fòrça cambis. Eth resultat mès just auesse estat un empat, mès eri profitèren fòrça ben es nòsti errors defensius enes cornèrs e enes dehòra de banda, pr’amor que toti es sòns gols s’ inicièren tamb ua jogada en qu’era pilota ère arturada.

Eth pròplèu partit ( darrèr partit de liga d’aguesta sason ) ac jogam en nòste terren de jòc eth dissabte 14 de mai tàs 20 :00 ores en Bossòst contra er equip deth Martres Tolosane.

ET Canton St Martory : Delhaye, Rey, Dauban, Loncan, Candani, Cazassus, Fourroux, Houe, Mhamadi, Doyen, Abdou. Remplaçants: Salles, Fumery, Joncour.
Trainer : Chourreau Jean Paul.
Tarjetes auriòles :Candani (87’).

U.E. Bossòst: Ignasi, Dani, Miguel, Viló, Jaime, Gachi, Alex, Paba, Marcos, Javi e Madrid.
Trainer: Adrian.
Tarjetes auriòles : Ignasi (1’), Viló (65’), Miguel (70’).

Gols : 1 -0 Adou (30’), 1-1 Paba (60’), Houe (65’), Madrid (75’), Abdou (90’).
Arbitre: Laïlle Guy.

Partit suspenut ena menuta 85’

U.S Garonne 1 - U.E. Bossòst 0

Partit arturat ena menuta 85 pes incidents que se produiren entre es dues aficions ena que prenèren part es jogadors des dus equips. Des d´açí didem que nosati èm en contra de tot acte de violéncia, mos agrade eth fotbòl e non es causes que passèren aguest darrèr dissabte.
Respecte ath partit, er U.S. Garonne gessèc milhor que nosati enes prumères menutes : de hèt, podèc auançà-se en marcador en un cop de cap de Saurrat que Marcos arturèc fòrça ben. As 15 menutes Felipe se lesionaue. Passat es 20 menutes, era U.E. Bossòst s’ apropèc mès ena porteria deth rivau e Paba shutaue en garròt. Ignasi e Pèir hèren a trebalhar ath portèr Garros, inedit enquia aguest moment, en auer de refusar era pilota. Tamb eth 0-0 s’arribaue ath descans.
Ena dusaua mietat en ua jogada en que se lesionèc Jorge, er arbitre fiulèc cornèr quan auíe d’ auer senhalat era fauta ath jogador aranés. En lançament deth cornèr er U.S. Garonne artenhèc eth 1-0 en rematar Watel e Marcos non podèc arturar era rematada. Tamb eth resultat en contra er equip aranés sajèc d’empatar eth partit. Pèir e Ignasi auèren eth gol a prop mès Garros, eth milhor jogador deth U.S. Garonne, podèc desviar es rematades. Reclamèrem un clar penalty a Ignasi mès er arbitre non fiulèc arren. Ena menuta 85 dempús dera expulsion de Javi se produiren es lamentables incidents que portèren ar arbitre a arturar eth partit.
Ara, eth Comité de Litiges dera F.F.F. a de préner era decision sus es hèts qu´an passat. Se siguèsse un partit deth campionat, partit perdut as dus equips. En èster era ½ finau dera Copa de Comminges non sabem qué passarà. Era nòsta opinion ei que cap des dus equips mereishen disputar era finau peth comportament antiesportiu dera sua aficion e des sòns jogadors.

Eth pròplèu partit jogam partit de liga eth dissabte 7 de mai tàs 20 :00 ores en Lestelle contra er equip Canton St. Martory.

U.S. Garonne : Garros, Dutheil, Verge, Baboulet, Loutfi, Heuillet, Pellegrin, Watel, Pailloux, Saurrat, Belarbi. Rempaçants : El Saoui, Silvert.
Trainer : Laplagne Jean Michel.
Tarjetes auriòles : Belarbi (45’).

U.E. Bossòst: Marcos, Dani (45’ Moha), Marc, Viló, Felipe (15’ Gachi), Jorge (60’ Arroyo) , Javi, Alex, Paba, Ignasi, e Pèir.
Trainer: Adrian.
Tarjetes auriòles : Marc, Viló, Gachi.
Tarjeta vermelha : Javi

Gols : 1 -0 Watel (60’).
Arbitre: Bouchaib Karim.
Líniers : St Paul Arnaud, Duprat Philippe.